لەم  شەڕە کێ دەیباتەوە! 

رزگار محمد

لە ئێستادا لە عێڕاق و هەرێمی کوردستان  حزب و میلیشاکان جومگەکانی دەسەڵاتیان گرتووە،  لەبەر ئەوەی سەرۆک وەزیرانی عێراق و سەرۆک وەزیرانی هەرێمی کوردستان هەڵبژاردەی حزبن و  لە لایەن حزبەوە هەڵبژێردراون،  بۆیە ناتوانن لە قسەی حزبەکەیان دەرچن و وەک دەوڵەتمەدار مامەڵە بکەن.

وە کاتێک سەرۆک، وەزیر یان هەر بەرپرسێک لەلایەن هاوڵاتیانەوە هەڵنابژێردرێت ئەوە  دەرئەنجامەکەیەتی کە ئێستا هەیە! 

بۆ نمونە؛

لە چەند رۆژی رابردوودا شەڕ لە نێوان 

پۆلیس و حەشدی شەعبی روویدا، بەهۆیەوە   چەند کەسێک بوونە قوربانی، دواتر هێزەکانی پۆلیس کشانەوەو سەرئەنجام حەشدی شەعبی براوە بوون!

لەبەر ئەوەی ئەو پۆلیسانەی لەو شەڕەدا بەشدار بوون بێ پشت و لایەن بوون بۆیە نەیانتوانی ئەرکی خۆیان راپەڕێنن و کشانەوە.

نمونەیەکی تر، ئەمجارە لە هەرێمی کوردستان و شاری سلێمانیەوە، کاتێک سەرۆکی یەکێتی و فەرمانڕەوای زۆرنی سەوز بافێڵ تاڵەبانی بریاریدا هێرش بکاتە سەر  لاهوور شێخ جەنگی،لەبری  دەستگیردنی ناوبراو لە ڕێگای پۆلیسەوە  هەستا هەموو هێزەکانی خۆی کۆکردەوە  هێرشی کردە سەر لاهوور جەنگی و دەستگیری کرد، 

لەو شەڕەدا چەندین کەس بوونە قوربانی و  پۆلیس و هێزە حوکمیەکان تەنها تەماشاکەر بوون!

هۆکارەکەی ڕونە کە بۆ پۆلیس بەشدار نەبوو، 

چونکە هەردوولا دەیانزانی ئەو شەڕ و روبەڕوبونەوەیە بە هێزەکانی پۆلیس ناکرێت، نە ئەم دەتوانێ بە پۆلیس ناوبراو بگرێ و نە پۆلیسیش توانای ڕوبەڕوبونەوەی ئەوی هەیە!

بۆیە هێزە حزبیەکەکانیان بەکارهێنا و بوو بە شەڕێکی دوو گروپی میلیشیایی بەرامبەر یەک! 

دەیان و سەدان نمونەی وا هەیە کە دەکرێت بیخەینە ڕوو، بەڵام حەزناکەم بابەتەکە دريژ بکەمەوە.

بە کورتی دەمەوێت ئەوە بڵێم لە عێڕاق و کوردستان، میلیشیا و هێزە حزبیەکان باڵادەستن و دەزگا ئەمنیە حوکمەیەکان تەنها رۆڵێکی کارتۆنیان هەیە و هەمیشە شکستخواردوو بوون بەرامبەر میلیشیاکان.

بۆیە ئێستا کاتی ئەوەیە چاکسازی راستەقینە بکرێت ئەویش بەهەڵوەشاندنەوەی هەموو ئەو هێزە حزبی و بنەماڵەیی و میلیشیاییانە.

بۆیە هیوادارم هیچ کەسێک چەکیان بۆ هەڵنەگرێ و چیتر گەنجانی وڵاتەکەم نەبنە قوربانی شەڕی بەرژەوەندی حزب و بنەماڵەکان.