ناسەربەخۆیی دادگاکان عێراق و کوردستان بەرەو کوێ دەبات
کارمەند حاجی – چالاکوانی سیاسی
سەربەخۆیی دەسەڵاتی دادوەری یەکێکە لە پایەکانی بنیاتنانی دەوڵەتێکی دیموکراتیی کە تێیدا کەرامەت و شکۆی تاکەکانی پارێزراو دەبێت. هەر قەواریەک لە سەرەتای دروستکردنیدا بێت یان لە قۆناغی خۆ بنیاتنانەوە و چاکسازییدا بێت، لە پێناو پاراسستنی ئاسایش و شکۆی هاونیشتیمانیان، پێویستە دەسەڵاتی دادوەری سەربەخۆ بێت و دوور بێت لە هەموو دەستوەردانێکی دەرەکی، جا ئەو دەستوەردانە ئیقلیمی بێت یان ناوخۆیی.
شتێکی لۆجیکییە کە پێمان وابێت عێراق بەگشتی لە قۆناغی خۆبنیاتنانەوە و چاکسازییدایە، هەرێمی کوردستانیش بە ماوەیەکی راگوزەردا تێدەپەڕێت لە قۆناغی دروستکردنەوە بەرەو چاکسازیی، لە هەر دوو باردا پێویستییە هەرە بنەڕەتییەکە بریتییە لە دەسەڵاتی دادوەری، بەڵام دەسەڵاتێکی دادوەری سەربەخۆ. ئەوەی لای زۆرینەی خەڵکی ئاشکرایە، دادگاکانی عێراق لە دوای پرۆسەی ئازادی نەیانتوانیووە سەربەخۆیی خۆیان بپارێزن. هەمیشە کەوتوونەتە ژێر هەژموونی پارت و لایەنە دەسەڵاتدارەکان، لەم دواییانەش زۆر بەڕوونی دیارە کە دەسەڵاتی دادوەری لە ژێر پەستان و هەیمەنەی دەوڵەتە ئیقلیمییەکاندایە.
هەرچی دەسەڵاتی دادوەری کوردستانیشە، بێبەش نیە لەم باسە و بگرە پشکی شێری بەردەکەوێت. دادگاکانی عێراق رەنگە لەژێر کاریگەری چەند لایەنێکی جیاوازی نێوخۆیی و ئیقلیمییدابن بەڵام دادگاکانی کوردستان دابەش بوون بەسەر دوو بەش و زۆندا؛ زۆنی زەرد و زۆنی سەوز. دەکرێت لە هەر کەیسێکی نێو دادگاکانی هەرێمی کوردستان دەستوەردان بکرێت و بە ئاقار و ئاراستەیەکدا ببرێت کە لایەنە دەسەڵاتدارەکان دەیانەوێت. ڕاشکاوانەتر بڵێین، لە هەر دادگایەکی سنوری زەرد، هەر کەیسێکی سیاسی یان رۆژنامەوانی هەبێت، بێشک و گومان دەرئەنجامی دادگاکە پێشتر لەلایەنی دەسەڵاتدارانی ئەو زۆنە بڕیاری لەسەر دراوە، دادوەر تەنها بڕیارەکە دەخوێنێتەوە. زیندووترین نمونەش کەیسی زیندانیانی بادینان و شێروان شێروانییە. ئەمە بۆ زۆنی سەوزیش هەر ڕاستە و پێشهاتەکانی ئەم چەند هەفتەی رابردوو شایەتی ئەم ڕاستییەن. تەنانەت چەند بەرپرسێکی حزبیی ئێستا و ڕابردوو خۆیان لە چەند دیمانەیەکدا دانیان بەو راستییەدا ناوە کە دادگالکان سەربەخۆنین و لەژێر فەرمانی ئەواندا هەڵسوکەوتیان کردووە.
سەرئەنجام ئێمە دەگەینە ئەو ڕاستییە تاڵەی کە دادگاکانی عیراق و کوردستان نەک هەر سەربەخۆنین، بەڵکو ئاراستەکراویشن. ئەمەش ئاماژەیەکی ڕوون و ئاشکرایە کە عیراق بەگشتی بەرەو ئۆتۆریتاریەت دەڕوات و کوردستانیش بەرەو دوو ئیدارەییەک کە لەژێر پەردە و ناوی حکومەتی هەرێمی کوردستان خۆی حەشارداوە. کۆتا شت کە بیری دەسەڵاتدارانی ناوچەکە بکەوێتەوە مافی مرۆڤ و ئازادی ڕادەربڕینن. بۆیە سەلامەتیی و ئاسایشی هاونیشتیمانیانی عیراق و کوردستان بە نەبوونی سەربەخۆیی دادگاکان رۆژ بە رۆژ دەکەوێتە ژێر پرسیاری جدیترەوە.
Post Comment