جارێک چووم تا لێواری دەریا
سەرمەند ئیسماعیل
جارێک چووم تا لێواری دەریا…
بەلەمی بچکۆلەم بینی، نەیدەزانی بۆ کوێ دەڕوا،
تۆڕم بینی بە ماسییەکانەوە هەڕاجدەکرا،
چارۆکەی کەشتیم بینی لەگەڵ باڵندەکاندا دەفڕی.
بوکی دەریام بینی بە ئاهەنگی ماسیگران سەمایدەکرد.
…
کەشتییەوانم بینی، ژیانی بووبوو بە قولاپەوە و دەگریا.
نەهەنگم بینی بەرەو مانگ خۆی هەڵدەدا.
ژنی دەریاوانی مردووم بینی، لەشی خۆی پیشانی ئاو دەدا.
چەتەم بینی بەر لەوەی سوار کەشتيی پیاوکوژان بێت،
وەکو مۆرفین، عەشقی لە خۆی دەدا.
ڕۆژێک تا قەراغی ئۆقیانوس ڕۆیشتم، تەنهابووم،
وەک هەموو تەنهاکان، دەستم لە ڕوناکی ڕادەگرت بمبات.
وەک هەموو تەنهاکان حەزم لە ڕێگای دوور بوو.
حەزم لە هێمنی، لە ئاسۆ، لە ئاوی بێسنوور بوو.
ڕۆیشتم تا گوێم لە هەناسەی پڕ غەمی با بوو،
وامدەزانی کە ئاسمانە دەگری،
کەچی نا… نا…
هەمووی هەر ناڵینی با بوو، هەمووی هەنسکی دەریا بوو.
Post Comment