گەندەڵی ڕەگی لە داردانی ئازادی ڕادەربڕین.!
پێشەوا عبداللە محمد
گەندەڵی تەنها لە دزینی پارە و نادیاری سامانی گشتی نییە؛ گەندەڵی کاتێک قووڵتر و مەترسیدارتر دەبێت کە دەستدرێژی بۆ سەر ئازادییەکان بکات.
لە هەستی زۆرێک لە هاووڵاتیاندا، کێشەکە تەنها ئەوە نییە کە سامانی گشتی چۆن بەڕێوە دەبرێت، بەڵکو ئەوەشە کە دەنگی ناڕازی و ڕەخنەگر چۆن مامەڵەی لەگەڵ دەکرێت.
هیچ سیستەمێک بە هەندەی ئەوە لاواز نییە کە لە دەنگی ڕەخنە بترسێت. دەسەڵاتێک کە متمانەی بە خۆی هەبێت، ڕووبەڕووی پرسیار و ڕەخنە دەبێتەوە؛ بەڵام دەسەڵاتێک کە هەموو دەنگێکی جیاواز بە مەترسی دەزانێت، زۆرجار هەوڵ دەدات ئەو دەنگانە سنووردار بکات یان بێدەنگیان بکات.
لەبەر ئەوە، زۆرێک لە چاودێران و چالاکوانان پێیان وایە کە شۆڕش دژی گەندەڵی جیا ناکرێتەوە لە شۆڕش بۆ ئازادیی ڕادەربڕین.
چونکە ئەگەر ڕۆژنامەنووس، نووسەر، چالاکوان یان هاووڵاتی ئاسایی نەتوانێت بە ئازادی پرسیار بکات و ڕەخنە ئاراستەی دەسەڵات بکات، ئەوا گەندەڵی زیاتر لە تاریکی و بێ چاودێریدا گەشە دەکات.
پرسیارەکە بۆ پارتی و یەکێتی و هەموو هێزە سیاسییەکان ئەوەیە: ئایا ئامادەن لەگەڵ ڕەخنەدا بژین و دەنگی جیاواز وەک بەشێک لە ژیانی دیموکراتی وەربگرن، یان هێشتا هەر دەنگێکی ناڕازی بە دوژمنایەتی لێک دەدەنەوە؟ مێژوو فێری کردووین کە کپکردنی دەنگی ئازاد کاتێک لە ماوەیەکی کورتدا بێدەنگی دروست دەکات، لە ماوەیەکی درێژدا بێمتمانەیی و توڕەیی کۆمەڵایەتی دروست دەکات.
کوردستان پێویستی بە حوکمڕانییەک هەیە کە دژی گەندەڵی و کپک کردنی مافی ڕەخنەگرتن و دەنگی ئازادی بوەستێ وە وەک بناغەیەکی سەرەکی بپارێزێت.
چونکە ئەو کۆمەڵگایەی کە دەنگی ئازاد تێدا کپ بکرێت، گەندەڵی بە ئاسانی دەتوانێت لە تاریکیی بێ چاودێریدا گەشە بکات و ببێتە بەشێک لە ژیانی ڕۆژانە.
Post Comment